ធនាគារ ប្រៃសណីយ៍កម្ពុជា និងគ្រឹះស្ថានមីក្រូហិរញ្ញវត្ថុ អម្រឹត សហការគ្នា ដើម្បីផ្តល់ជូនអតិថិជន នូវភាពងាយស្រួលក្នុងការប្រើប្រាស់ប័ណ្ណATM និងប័ណ្ណវីសាឥណពន្ធរបស់ខ្លួន ក្នុងការដកប្រាក់តាមរយៈម៉ាស៊ីនATM របស់ស្ថាប័នទាំងពីរ នៅ២៥ខេត្តក្រុង ដោយឥតគិតថ្លៃសេវា។
ពិធីចុះហត្ថលេខាលើកិច្ចសហប្រតិបត្តិការភាពជាដៃគូ នៃគ្រឹះស្ថានហិរញ្ញវត្ថុទាំងពីរ បានធ្វើឡើងនៅថ្ងៃទី០៨ ខែមេសា ឆ្នាំ២០២២ នៅសណ្ឋាគារទីក្រុងអូឡាំព្យា ដោយមានការចូលរួមដោយគណៈគ្រប់គ្រងជាន់ខ្ពស់ នៃស្ថាប័នទាំងពីរ។
បច្ចុប្បន្ន ធនាគារ ប្រៃសណីយ៍កម្ពុជា មានបណ្តាញម៉ាស៊ីន ATM សរុប ៨៩ទីតាំងនៅទូទាំងប្រទេស ចំណែកគ្រឹះស្ថានមីក្រូហិរញ្ញវត្ថុ អម្រឹត មានបណ្តាញម៉ាស៊ីន ATM សរុប ៣៤ ទីតាំងទូទាំងប្រទេស។ នេះមានន័យថា អតិថិជនទាំងអស់របស់ធនាគារ ប្រៃសណីយ៍កម្ពុជា និងគ្រឹះស្ថានមីក្រូហិរញ្ញវត្ថុ អម្រឹត អាចដកប្រាក់ពីម៉ាស៊ីន ATM សរុប ១២៣ទីតាំងទូទាំងប្រទេស ដោយឥតគិតថ្លៃសេវា។
លោក តូច ចៅចេក ប្រធាននាយកប្រតិបត្តិ នៃធនាគារ ប្រៃសណីយ៍កម្ពុជា បានមានប្រសាសន៍ថា «ធនាគារ ប្រៃសណីយ៍កម្ពុជា ពិតជាមានសេចក្តីសោមនស្សជាខ្លាំងដែលបានក្លាយជាដៃគូសហការជាមួយគ្រឹះស្ថានមីក្រូហិរញ្ញវត្ថុ អម្រឹត ហើយកិច្ចសហប្រតិបត្តិការមួយនេះ គឺជាយុទ្ធសាស្រ្តរបស់ស្ថាប័នទាំងពីរ ដែលធ្វើឡើងក្នុងគោលដៅរួម គឺដើម្បីពង្រឹង និងពង្រីកសេវាកម្មរបស់ខ្លួនឱ្យកាន់តែរហ័ស ងាយស្រួល និងខិតជិតអតិថិជន។»
លោក ដុស ឌីន អគ្គនាយកនៃគ្រឹះស្ថានមីក្រូហិរញ្ញវត្ថុ អម្រឹត បានលើកឡើងថា «កិច្ចសហការលើភាពជាដៃគូក្នុងថ្ងៃនេះ នឹងធ្វើឱ្យអតិថិជនរបស់ ស្ថាប័នទាំងពីរ កាន់តែមានភាពងាយស្រួល និងអាចទទួលបានអត្ថប្រយោជន៍កាន់តែជាច្រើនពីប្រតិបត្តិការហិរញ្ញវត្ថុតាមរយៈម៉ាស៊ីនATM ដែលមានដូចជា៖ ការពិនិត្យសមតុល្យគណនី ផ្លាស់ប្តូរលេខសម្ងាត់ ពិនិត្យរបាយការណ៍សង្ខេប និងដកប្រាក់បានគ្រប់ពេលវេលា នៅតាមម៉ាស៊ីនATM របស់ស្ថាប័នទាំងពីរដោយឥតគិតថ្លៃផងដែរ។»
ធនាគារ ប្រៃសណីយ៍កម្ពុជា ក.អ (CPBank) ជាធនាគារពាណិជ្ជដ៏ធំមួយក្នុងចំណោមធនាគារពាណិជ្ជល្បីៗឈានមុខគេនៅប្រទសកម្ពុជា ដែលត្រូវបានបង្កើត ឡើងក្នុងខែកញ្ញា ឆ្នាំ២០១៣ ក្រោមដៃគូយុទ្ធសាស្ត្ររវាង កាណាឌីយ៉ា អ៊ីនវែសមិនហូលឌីង ប្រៃសណីយ៍កម្ពុជា នៃក្រសួងប្រៃសណីយ៍ និងទូរគមនាគមន៍កម្ពុជា និងហ្វូឡឹតុនហ្វាយណាន់ខាប់ពីតាល់។ ធនាគារមានសន្ទុះនៃការអភិវឌ្ឍ និងរីកចម្រើនយ៉ាងខ្លំាង ដែលគិតត្រឹមរយៈពេល ជាង ៨ឆ្នំានេះ ធនាគារសម្រេចបាននូវទំហំទ្រព្យសកម្មសរុបជាង ១ពាន់លានដុល្លារអាមេរិក ជាមួយនឹងបណ្តាញប្រតិបត្តិការសាខាចំនួន ៦០សាខាទូទាំងប្រទេស និងបណ្តាញម៉ាស៊ីនATM ៨៩ទីតាំង។ ធនាគារ ប្រៃសណីយ៍កម្ពុជា ក៏ជាធនាគារឆ្នើមមួយនៅប្រទេសកម្ពុជា ដែលទទួលបានពានរង្វាន់ និងវិញ្ញាបនបត្រសរសើរពីស្ថាប័នជាតិ និងអន្តរជាតិជាច្រើនផងដែរ។ ក្នុងពេលថ្មីៗនេះ ធនាគារប្រៃសណីយ៍កម្ពុជា ក៏ទើបតែឈ្នះពានរង្វាន់អន្តរជាតិ «Fastest Growing Retail and SME Bank-Cambodia 2022» ពី International Business Magazine ពីសហភាពអារ៉ាប់រួមផងដែរ។
