អំពីធនាគារ

ប្រវត្តិរបស់ធនាគារ

ធនាគារ ប្រៃសណីយ៍កម្ពុជា ក.អ ជាធនាគារពាណិជ្ជមួយដែលរីកចម្រើន​លឿនបំផុតក្នុងចំណោមធនាគារពាណិជ្ជ និងគ្រឹះស្ថានហិរញ្ញវត្ថុឈានមុខនៅក្នុងប្រទេសកម្ពុជាដែលត្រូវបានបង្កើតឡើងក្នុងខែកញ្ញាឆ្នាំ២០១៣ ក្រោមដៃគូយុទ្ធសាស្ត្ររវាងកាណាឌីយ៉ាអ៊ីនវេសមិនហូលឌីង ប្រៃសណីយ៍កម្ពុជានៃក្រសួងប្រៃសណីយ៍ និងទូរគមនាគមន៍កម្ពុជា និងហ្វូឡឹតុនហ្វាយណាន់ស៊្យលខាប់ពីតាល់(Fullerton Financial Capital Pte.)។ ចាប់ពីឆ្នាំ ២០១៣ រហូតមកដល់បច្ចុប្បន្ន ធនាគារ​បានវិវឌ្ឍខ្លួន​ទៅ​ជាធនាគារពាណិជ្ជដ៏​បំផុតមួយ​សម្រាប់​អតិថិជនទូទៅនៅប្រទេស​កម្ពុជា ដោយ​បាន​ទទួលយកការអនុវត្តជាសាកលល្អបំផុត និងស្ថិតនៅជួរមុខគេក្នុងការទទួលយក​គំនិតផ្តួចផ្តើមថ្មីៗផ្នែកបច្ចេកវិទ្យា។ ធនាគារ​ វាស់ស្ទង់ភាពជោគជ័យរបស់ខ្លួន មិនត្រឹមតែតាមរយៈ​ចំនួន​ប្រាក់ចំណូលប៉ុណ្ណោះទេ ប៉ុន្តែធនាគារ​ក៏មើលទៅលើ​សមិទ្ធផល​សំខាន់ៗនានា ក្នុង​ការ​បំពេញតម្រូវការ​កើនឡើង​របស់អតិថិជន​ ដែល​ជួយឱ្យ​ធនាគារ ក្លាយជាធនាគារដែលមានការប្រកួតប្រជែងធំបំផុតមួយ នៅក្នុងប្រទេកម្ពុជា។

ក្នុងរយៈពេល៨ឆ្នាំនៃប្រតិបត្តិការ ធនាគារបានបោះជំហានយ៉ាងលឿន ក្លាយ ជាធនាគារបែបឌីជីថលដែលអនុញ្ញាតឱ្យអតិថិជនអាចប្រើប្រាស់ និងគ្រប់គ្រងហិរញ្ញវត្ថុបានយ៉ាងងាយស្រួល និងមានសុវត្ថិភាពខ្ពស់បំផុតតាមរយៈទូរសព្ទដៃ។ បច្ចុប្បន្ន អតិថិជន​អាច​ស្នើសុំឥណទាន និងស្នើសុំបើកគណនីតាមអនឡាញ ដោយមិនចាំបាច់ធ្វើដំណើរមកកាន់សាខារបស់ធនាគារឡើយ។ ធនាគារ​ ក៏បាន​ដាក់ឱ្យប្រើប្រាស់មុខងារ QRស្កេន ទូទាត់វិក្កយបត្រ សេវាបង់ប្រាក់ពន្ធ-អាករ សេវាផ្ទេរប្រាក់ឆ្លងធនាគារតាមរយៈប្រព័ន្ធបាគង ប្រព័ន្ធរីធែលផេ (Retail Pay) ប្រព័ន្ធទូទាត់រហ័ស (FAST) បញ្ចូលទឹកប្រាក់ទូរសព្ទ និងមុខងារជាច្រើនផ្សេងទៀត ដែល​ធ្វើ​ឱ្យប្រតិបត្តិការហិរញ្ញវត្ថុមានភាពងាយ ស្រួល និងមានសុវត្ថិភាព។ មិនត្រឹមតែប៉ុណ្ណោះ ធនាគារក៏មានសេវាធនាគារ ៣៦៥ថ្ងៃ ចំនួន​៣សាខានៅ​រាជធានីភ្នំពេញ រួមមានសាខាការិយាល័យកណ្តាល សាខាសែនសុខ (ផ្សារទំនើបអ៊ីអនម៉ល់សែនសុខ)​ និងសាខាអូឡាំពិក ដែលបម្រើសេវាធនាគារជូនអតិថិជនជារៀងរាល់ថ្ងៃ ទាំងថ្ងៃចុងសប្តាហ៍ និងថ្ងៃឈប់សម្រាកបុណ្យជាតិ។ ទាំង​នេះបានផ្តល់នូវភាពងាយស្រួល ដល់អតិថិជនរបស់ធនាគារ​ ក្នុងការប្រើប្រាស់​សេវាធនាគារ ទោះបី​នៅថ្ងៃឈប់សម្រាកក៏ដោយ។

ធនាគារត្រូវបានបង្កើតឡើងដំបូងជាមួយនឹងដើមទុនចុះបញ្ជីចំនួន៣៨លានដុល្លារអាមេរិកក្នុងឆ្នាំ២០១៣ និងបាន​កើនឡើងដល់ ៧៦លានដុល្លារអាមេរិកក្នុង​ពេល​បច្ចុប្បន្ន។ គិតត្រឹមឆ្នាំ២០២១ ធនាគារសម្រេចបាននូវទ្រព្យសកម្មសរុបជាង ១,១៨ ពាន់លានដុល្លារអាមេរិក ជាមួយនឹងបណ្តាញប្រតិបត្តិការសាខាលាតសន្ធឹងពេញផ្ទៃប្រទេសចំនួន ៦០សាខា ម៉ាស៊ីនអេធីអឹម និងម៉ាស៊ីនដាក់ប្រាក់ ៨៩ទីតាំង ចំនួនគណនីអតិថិជនសរុប ១១៦.៧៤៣គណនី ចំនួនប័ណ្ណអេធីអឹម និងប័ណ្ណឥណពន្ធ សរុប ៧៤.៥៩០ប័ណ្ណ និងដៃគូអាជីវកម្ម ៧.០៤៩កន្លែងទូទាំងប្រទេស។ ធនាគារ​ ក៏បានសហការជាមួយគ្រឹះស្ថានហិរញ្ញវត្ថុនានា ដូចជា វីង និងទ្រូម៉ាន់នី ដែលធ្វើឱ្យអតិថិជនអាចទូទាត់​សងប្រាក់​កម្ចីវិញ​បាន​កាន់​តែងាយស្រួល។ ​ធនាគារ​បានចាប់ដៃគូជាមួយគ្រឹះស្ថាន​ហិរញ្ញវត្ថុផ្សេងទៀតដូចជា អេ អឹម ខេ និងអម្រឹត ដែល​អនុញ្ញាត​ឱ្យអតិថិជន​នៃស្ថានប័នទាំងបី​អាចដកប្រាក់​ពី​ម៉ាស៊ីនអេធីអឹមគ្នាទៅវិញទៅមក​ដោយឥតគិតថ្លៃ​ ដោយប្រើប្រាស់​ប្រព័ន្ធ CSS របស់ ធនាគារជាតិ នៃកម្ពុជា។ ធនាគារ​ចូលរួមក្នុងគំនិតផ្តួចផ្តើមផ្សេងៗរបស់រដ្ឋាភិបាលក្នុងការកសាងសេដ្ឋកិច្ចឡើងវិញ តាមរយៈ ធនាគារសហគ្រាសធុនតូច និងមធ្យម កម្ពុជា និងសាជីវកម្មធានាឥណទានកម្ពុជា។ ទាំងនេះ គឺជា​ការ​គាំទ្រគំនិតផ្តួចផ្តើមរបស់រាជរដ្ឋាភិបាលកម្ពុជា ក្នុងការអភិវឌ្ឍ និងពង្រឹងសហគ្រាសធុនតូច និងមធ្យម ដែលជាផ្នែកនៃយុទ្ធសាស្ត្រស្តារសេដ្ឋកិច្ចក្នុងបរិបទថ្មី ២០២១-២០២២។

ធនាគារ ក៏សម្រេចបាននូវប្រសិទ្ធនាម និងពានរង្វាន់ជាច្រើនពីស្ថាប័នជាតិ និងអន្តរជាតិផងដែរ។ នៅឆ្នាំ ២០២១ ធនាគារ បានទទួលពានរង្វាន់ កិត្តិយស “SME Financier of the Year-Asia” ពី IFC និង SME Finance Forumសម្រាប់ការចូលរួមចំណែកគួរឱ្យកត់សម្គាល់ចំពោះសហគ្រាសធុនតូច និងមធ្យមនៅកម្ពុជា។ ធនាគារ​ ក៏ជាសហគ្រាសជាប់ចំណាត់ថ្នាក់ទី​២៨ ក្នុង​ចំណោម​សហគ្រាស​ដែល​បង់ពន្ធច្រើនជាងគេនៅ​ប្រទេសកម្ពុជា​​ និង​ទទួលបាន​អនុលោម​ភាព​សារពើពន្ធ​ប្រភេទមាស​​ ក្នុង​ឆ្នាំ​២០២១ផងដែរ។

ធនាគារប្តេជ្ញាក្នុងការកសាងគោលជំហរដ៏មុតមាំមួយប្រកបដោយក្រមសីល ធម៌វិជ្ជាជីវៈ និងបទដ្ឋានត្រឹមត្រូវក្នុងការថែរក្សា និងលើកកម្ពស់ប្រសិទ្ធភាពការងារ ដើម្បីនាំយកផលិតផល និងសេវាកម្មល្អ​បំផុត​ជូនអតិថិជន។ ធនាគារ​កំពុង​ព្យាយាម​សម្រេច​ ចក្ខុវិស័យ “គ្រួសារមួយ គណនីមួយ” ដែល​ធនាគារ​ចង់សម្រេច​ឱ្យ​បាន​នៅ​ប្រាំឆ្នាំ​ខាងមុខ។ ធនាគារ​បានទិញយកគ្រឹះស្ថានមីក្រូហិរញ្ញវត្ថុហ្វូណន ក្នុងឆ្នាំ២០១៧ ដើម្បីពង្រីក​វិសាលភាព​របស់ខ្លួន ឱ្យ​ធំជាងមុន ជាពិសេសអតិថិជន​ដែល​ត្រូវការ​សេវាហិរញ្ញវត្ថុខ្នាតតូច។ គ្រឹះស្ថានមីក្រូ ហិរញ្ញវត្ថុហ្វូណន ដែល​ជាក្រុមហ៊ុនបុត្រសម្ព័ន្ធរបស់ ធនាគារ​ មានបណ្តាញប្រតិបត្តិការ​ ចំនួន​ ៥១សាខា គ្របដណ្តប់យ៉ាងទូលំទូលាយនៅទូទាំងប្រទេសផងដែរ។ ធនាគារ​ផ្តល់ជូននូវផលិតផលជាច្រើនប្រភេទ ដើម្បីបំពេញតម្រូវការទីផ្សារដ៏ធំនៅ​កម្ពុជា​។

ធនាគារប្តេជ្ញារចនា និងផ្តល់នូវផលិតផលប្រកបដោយភាពច្នៃប្រឌិតខ្ពស់ជូនអតិថិជន និងកំណត់ស្តង់ដារសេវាកម្មល្អបំផុតមួយ​នៅក្នុងប្រទេសកម្ពុជា។

កាណាឌីយ៉ា អ៊ីវេសមិនហូលឌីង ភីអិលស៊ី

កាណាឌីយ៉ា​ អ៊ីនវេសមិនហូលឌីង ភីអិលស៊ី ជាក្រុមហ៊ុនវិនិយោគលើវិស័យហិរញ្ញវត្ថុដ៏ធំ​ និងគួរឱ្យទុកចិត្តមួយនៅក្នុងប្រទេសកម្ពុជា។ កាណាឌីយ៉ាអ៊ីនវេសមិនហូលឌីង មានទ្រព្យសកម្មសរុបជាង ៨,២ពាន់លានដុល្លារអាមេរិក គិតត្រឹមចុងឆ្នាំ២០២១។ កាណាឌីយ៉ា អ៊ីនវេសមិនហូលឌីង មានក្រុមហ៊ុនបុត្រសម្ព័ន្ធ និងសាខា ទាំងអស់ចំនួន៨ ស្ថាប័ន ក្នុងការផ្តល់នូវសេវាធនាគារនិងហិរញ្ញវត្ថុ(សាជីវកម្មសហគ្រាសខ្នាតធំ ខ្នាតតូច និងមធ្យម) មីក្រូហិរញ្ញវត្ថុ ធានារ៉ាប់រងអាយុជីវិត ធានារ៉ាប់រងទូទៅ និង ទីផ្សារមូលបត្រក្នុងប្រទេសកម្ពុជា។ កាណាឌីយ៉ា អ៊ីនវេសមិនហូលឌីង មានបទពិសោធន៍ជាច្រើនឆ្នាំនៅក្នុងទីផ្សារកម្ពុជា និងធ្វើប្រតិបត្តិការដោយមានវិន័យ និងប្រកបដោយទំនួលខុសត្រូវក្នុងសង្គម។

ហ្វូឡឹតុនហ្វាយណាន់ស៊្យលខាប់ពីតាល់ ភីធីអ៊ី 

ហ្វូឡឹតុនហ្វាយណាន់ស៊្យលខាប់ពីតាល់ ភីធីអ៊ី គឺជាបុត្រសម្ព័ន្ធរបស់ ហ្វូឡឹតុន ហ្វាយណាន់ស៊្យលហូលឌីង។ ហ្វូឡឹតុន ហ្វាយណាន់ស៊្យលហូលឌីង បានវិនិយោគ និងធ្វើប្រតិបត្តិការជាស្ថាប័នហិរញ្ញវត្ថុនៅក្នុងទីផ្សារដែលកំពុងរីកចម្រើនដោយផ្តោតលើការបម្រើសេវាកម្មដល់សហគ្រាសខ្នាតតូចនិងមធ្យម និងអាជីវកម្មទីផ្សារចម្រុះតាមរយៈការអភិវឌ្ឍន៍និងប្រតិបត្តិនូវខ្នាតគំរូអាជីវកម្មប្រកបដោយភាពច្នៃប្រឌិតខ្ពស់ និងល្អដាច់គេ។

ប្រៃសណីយ៍កម្ពុជា (នៃក្រសួងប្រៃសណីយ៍ និងទូរគមនាគមន៍កម្ពុជា)

ប្រៃសណីយ៍កម្ពុជាគឺជាអង្គភាពសាធារណៈ និងជាក្រុមហ៊ុនរបស់រដ្ឋ  ដែលស្ថិតនៅក្រោមក្រសួងប្រៃសណីយ៍និងទូរគមនាគមន៍(MPTC)និងត្រូវបានគ្រប់គ្រងផ្នែកហិរិញ្ញវត្ថុ ដោយក្រសួង សេដ្ឋកិច្ច និង ហិរិញ្ញវត្ថុ (MEF) ។

ប្រៃសណីយ៍កម្ពុជាទទួលបានសិទ្ធិអំណាចពិសេសដែលផ្តល់ដោយរដ្ឋាភិបាល ក្នុងការជួយគាំទ្រនូវ គោលបំណង បេសកកម្ម ចក្ខុវិស័យ និងគោលនយោបាយរបស់រាជរដ្ឋាភិបាល។