យោបល់សង្ខេបរបស់ប្រធានក្រុមប្រឹក្សាភិបាល

“ធនាគារនឹងបន្តរក្សាការប្រុងប្រយ័ត្ន និងព្យាយាមសម្របខ្លួនទៅតាមស្ថានភាពនានា ដើម្បីចាប់យកឱកាសថ្មីៗ”

ខ្ញុំពិតជាមានមោទកភាពចំពោះវឌ្ឍនភាព និងសមិទ្ធិផលនានា ដែលធនាគារ ប្រៃសណីយ៍កម្ពុជា ក.អ សម្រេចបានក្នុងឆ្នាំ២០២៤ ហើយខ្ញុំក៏សូមថ្លែងអំណរគុណចំពោះការខិតខំប្រឹងប្រែងអស់ពីកម្លាំងកាយចិត្តរបស់បុគ្គលិកគ្រប់ជាន់ថ្នាក់ និងការបន្តគាំទ្រពីសំណាក់អតិថិជន និងដៃគូនានារបស់ធនាគារ។ ទោះបីធនាគារជួបបញ្ហាប្រឈមមួយចំនួនដោយសារការប្រែប្រួលស្ថានភាពសេដ្ឋកិច្ចក៏ដោយ ក៏ធនាគារនៅតែអាចរក្សាកំណើនប្រកបដោយនិរន្តរភាព និងបន្តផ្តល់គុណតម្លៃជូនដល់ភាគីពាក់ព័ន្ធ។

ក្នុងឆ្នាំ២០២៤ ធនាគារបានផ្តោតលើការពង្រឹងសេវាកម្មឌីជីថល ដោយធានាថាអតិថិជនអាចប្រើប្រាស់គណនីរបស់ពួកគេ ដើម្បីធ្វើប្រតិបត្តិការនានាដោយរលូនពីគ្រប់ទីកន្លែង។ ធនាគារជឿជាក់ថា ភាពច្នៃប្រឌិត គឺជាគន្លឹះក្នុងការបំពេញតម្រូវការនានារបស់អតិថិជន និងរក្សាការប្រកួតប្រជែងនៅក្នុងទីផ្សារ។

ការរួមចំណែកក្នុងសកម្មភាពសង្គម ក៏ជាមូលដ្ឋានគ្រឹះនៃបេសកកម្មរបស់ធនាគារផងដែរ។ ធនាគារមានមោទកភាព ដែលបានចូលរួមក្នុងគម្រោងជាច្រើនដើម្បីលើកកម្ពស់ចំណេះដឹងហិរញ្ញវត្ថុក្នុងសហគមន៍ និងគាំទ្រដល់ម្ចាស់អាជីវកម្មនានា ដើម្បីឱ្យពួកគេអាចបន្តប្រតិបត្តិការក្នុងស្ថានភាពសេដ្ឋកិច្ចដ៏លំបាក ដែលមានការប្រែប្រួលយ៉ាងឆាប់រហ័ស។ កិច្ចខិតខំប្រឹងប្រែងទាំងនេះ បានឆ្លុះបញ្ចាំងពីការប្តេជ្ញាចិត្តរបស់ធនាគារចំពោះទំនួលខុសត្រូវសង្គម និងការជួយជំរុញកំណើនសេដ្ឋកិច្ចប្រទេសកម្ពុជា។

ខ្ញុំពិតជាមានសេចក្ដីសោមនស្ស ដែលធនាគារ ប្រៃសណីយ៍កម្ពុជា ក.អ អាចរក្សាតារាងតុល្យការនៃទ្រព្យសកម្ម ១,៧៤ពាន់លានដុល្លារ ដែលក្នុងនោះផលបត្រឥណទានបានកើនឡើង ៨,៩% ផលបត្រប្រាក់បញ្ញើសន្សំបានកើនឡើង ២៦,២% និងទទួលបានប្រាក់ចំណេញ ១៨លានដុល្លារសម្រាប់ឆ្នាំ២០២៤។ យើងបានគ្រប់គ្រងធនាគារប្រកបដោយប្រសិទ្ធភាព ដោយរក្សាសន្ទនីយភាព និងដើមទុនបានល្អពេញមួយឆ្នាំ។ ក្រុមហ៊ុនបុត្រសម្ព័ន្ធរបស់ធនាគារ គឺហ្វូណន មីក្រូហិរញ្ញវត្ថុ ភីអិលស៊ី ក៏បានគ្រប់គ្រងប្រាក់ចំណេញបានយ៉ាងល្អក្នុងអំឡុងឆ្នាំ២០២៤ ផងដែរ បើទោះជាតម្រូវការទីផ្សារធ្លាក់ចុះក៏ដោយ។

សម្រាប់ឆ្នាំបន្ទាប់ ធនាគារនឹងបន្តរក្សាការប្រុងប្រយ័ត្ន និងព្យាយាមសម្របខ្លួនទៅតាមស្ថានភាពនានា ដើម្បីចាប់យកឱកាសថ្មីៗ។ យើងនឹងបន្តរួមគ្នា កសាងអនាគតដ៏ប្រសើរសម្រាប់ធនាគារ អតិថិជន និងសហគមន៍របស់យើង។

តាងនាមឱ្យក្រុមប្រឹក្សាភិបាល ខ្ញុំសូមថ្លែងអំណរគុណយ៉ាងជ្រាលជ្រៅចំពោះបុគ្គលិកគ្រប់ជាន់ថ្នាក់របស់ធនាគារ ចំពោះការខិតខំប្រឹងប្រែង និងការលះបង់របស់ពួកគេ ដើម្បីវឌ្ឍនភាពរបស់ធនាគារកន្លងមក។ សូមអរគុណចំពោះការបន្តជឿជាក់ និងគាំទ្រចំពោះធនាគារ ប្រៃសណីយ៍កម្ពុជា ក.អ។ ខ្ញុំមានមោទកភាពចំពោះគណៈគ្រប់គ្រងជាន់ខ្ពស់របស់ធនាគារ ដែលបានខិតខំបំពេញការងារឥតឈប់ឈរ ដែលបង្ហាញពីការប្តេជ្ញាចិត្តក្នុងការផ្តល់សេវាកម្មជូនអតិថិជនឱ្យកាន់តែប្រសើរ។ ខ្ញុំសូមថ្លែងអំណរគុណដល់រាជរដ្ឋាភិបាលកម្ពុជា និងស្ថាប័ននិយ័តករទាំងអស់ ជាពិសេសធនាគារជាតិនៃកម្ពុជា សម្រាប់ការគាំទ្រមកលើធនាគារ ប្រៃសណីយ៍កម្ពុជា ក.អ ឥតឈប់ឈរកន្លងមក។ ខ្ញុំសង្ឃឹមថា ធនាគារ ប្រៃសណីយ៍កម្ពុជា ក.អ នឹងបន្តរួមចំណែកបន្ថែមក្នុងការជំរុញកំណើនសេដ្ឋកិច្ចរបស់កម្ពុជា។