យោបល់សង្ខេបរបស់ប្រធានក្រុមប្រឹក្សាភិបាល

“គាំទ្រដល់កំណើនសេដ្ឋកិច្ច និងរួមចំណែកដល់ភាពរុងរឿងរបស់ប្រទេសកម្ពុជា តាមរយៈការជួយអតិថិជនឱ្យសម្រេចបាននូវគោលដៅហិរញ្ញវត្ថុរបស់ពួកគេ”

ចក្ខុវិស័យរបស់ធនាគារ ប្រៃសណីយ៍កម្ពុជា ក.អ គឺ «លើកកម្ពស់ជីវភាព និងជួយបំពេញបំណងការរីកចម្រើនរបស់ប្រជាជនកម្ពុជា» ដែលបានបង្ហាញពីសុទិដ្ឋិនិយម និងតួនាទីរបស់ធនាគារ ប្រៃសណីយ៍កម្ពុជា ក្នុងការគាំទ្រដល់កំណើនសេដ្ឋកិច្ច និងរួមចំណែកដល់ភាពរុងរឿងរបស់ប្រទេសកម្ពុជា តាមរយៈការជួយអតិថិជនឱ្យសម្រេចបាននូវគោលដៅហិរញ្ញវត្ថុរបស់ពួកគេ។ ឆ្នំា២០២២ គឺជាឆ្នាំដែលធនាគារជួបបញ្ហាប្រឈមបន្ថែម និងភាពមិនប្រាកដប្រជានានា ដូចគ្រប់ៗគ្នានៅលើពិភពលោក នៅពេលដែលយើងចាប់ផ្តើមសម្របខ្លួនដោយរៀនរស់នៅជាមួយកូវីដ១៩។ នៅក្នុងឆ្នាំ២០២២ ខេត្តមួយចំនួនក្នុងប្រទេសកម្ពុជាក៏បានរងគ្រោះដោយទឹកជំនន់ ដែលបណ្តាលឱ្យមានផលប៉ះពាល់ផ្នែកឧស្សាហកម្មផ្នែកហិរញ្ញវត្ថុ និងសង្គមយ៉ាងច្រើនដល់ប្រជាជនកម្ពុជាផងដែរ។ នៅពេលដែលប្រឈមមុខនឹងបញ្ហាទាំងអស់នេះ យើងបានដឹងថា ធនាគារជាផ្នែកមួយដ៏សំខាន់នៃសហគមន៍នេះ ហើយក្នុងនាមជាធនាគារ យើងតែងតែនៅជិតអតិថិជន ដើម្បីជួយដោះស្រាយបញ្ហាជាមួយគ្នា និងជួយជំរុញកំណើនសេដ្ឋកិច្ចឱ្យកាន់តែប្រសើរឡើងវិញ។

ពិភពលោកកំពុងប្រឈមមុខនឹងវិបត្តិដ៏ធ្ងន់ធ្ងរ ដែលបានជះឥទ្ធិពលអវិជ្ជមានដល់ប្រទេសកំពុងអភិវឌ្ឍ ប៉ះពាល់ដល់ប្រជាជនក្រីក្រ និងងាយរងគ្រោះ ដែលធ្វើឱ្យគម្លាតវិសមភាពពិភពលោកកាន់តែធំឡើង។ ការរំខាននៃខ្សែសង្វាក់ផលិតកម្ម និងផ្គត់ផ្គង់ ដោយសារវិធានការបិទខ្ទប់យ៉ាងតឹងរ៉ឹងនៅក្នុងប្រទេសចិន សង្រ្គាមនៅប្រទេសអ៊ុយក្រែន      អតុល្យភាពម៉ាក្រូសេដ្ឋកិច្ច កង្វះថាមពល ជី និងអាហារ បានបណ្តាលឱ្យមានការធ្លាក់ចុះសេដ្ឋកិច្ចពិភពលោកយ៉ាងធ្ងន់ធ្ងរបំផុតក្នុងរយៈពេល ៨០ឆ្នាំចុងក្រោយ ដែលជំរុញឱ្យអតិផរណាឈានដល់កម្រិតខ្ពស់បំផុត។ ការប្រមើមើលសម្រាប់ឆ្នាំបន្ទាប់ មិនមានភាពប្រាកដប្រជានៅឡើយទេ។ ការស្ទុះងើបឡើងវិញនៃសេដ្ឋកិច្ច និងអត្រាខ្ពស់នៃភាពមានការងារធ្វើ ត្រូវបានបង្អាក់ ដោយសារការកើនឡើងតម្លៃនៃការរស់នៅ តម្លៃថាមពល និងការខ្វះកម្លាំងពលកម្មក្នុងខ្សែសង្វាក់ផលិតកម្ម ដែលធ្វើឱ្យផលិតកម្ម និងការផ្តល់សេវាកម្មផ្សេងៗមានភាពយឺតយ៉ាវ។ ទោះជាយ៉ាងណាក៏ដោយ លក្ខខណ្ឌក្នុងស្រុក ដែលអំណោយផលរបស់ប្រទេសកម្ពុជា គួបផ្សំនឹងការកើនឡើងនៃតម្រូវការខាងក្រៅ បានធ្វើឱ្យសេដ្ឋកិច្ចរបស់ប្រទេសកម្ពុជាមានកំណើនរហូតដល់ ៥,១% នៅក្នុងឆ្នាំ២០២២។

ការកើនឡើងនៃការវិនិយោគពីបរទេស និងការនាំចេញ បានធ្វើឱ្យទុនបម្រុងអន្តរជាតិរបស់កម្ពុជា អាចប្រើប្រាស់បានរយៈពេលប្រហែល ៧ខែ សម្រាប់ការចំណាយលើការនាំចូលទំនិញ និងសេវាកម្មនានាពីក្រៅស្រុក។ នេះក៏បានគាំទ្រដល់ការអនុវត្តន៍គោលនយោបាយរូបិយវត្ថុ និងអត្រាប្តូរប្រាក់ ជាពិសេសក្នុងការរក្សាស្ថិរភាពអត្រាប្តូរប្រាក់ និងផ្តល់លំហូរសាច់ប្រាក់គ្រប់គ្រាន់ ដើម្បីរក្សាស្ថិរភាពតម្លៃ និងកំណើនសេដ្ឋកិច្ចប្រកបដោយនិរន្តរភាព។

ទោះបីជាមានបញ្ហាប្រឈមនៃផ្នែកសេដ្ឋកិច្ចនេះក៏ដោយ ក៏កំណើន និងគុណភាពឥណទានរបស់ធនាគារនៅតែមានស្ថិរភាព។ យើងខ្ញុំសូមថ្លែងអំណរគុណយ៉ាងស្មោះ

ស្ម័គ្រជូនចំពោះរាជរដ្ឋាភិបាលកម្ពុជា និងធនាគារជាតិនៃកម្ពុជា ដែលតែងតែគាំទ្រ និងដើរតួនាទីយ៉ាងសំខាន់ក្នុងការរក្សាស្ថិរភាព និងភាពធន់នៅក្នុងប្រព័ន្ធធនាគារ ដោយចាត់វិធានការបង្ការទុកជាមុនប្រកបដោយការប្រុងប្រយ័ត្នគ្រប់ពេលវេលា។ ការបន្តរាតត្បាតនៃជំងឺកូវីដ១៩នេះ មិនត្រឹមតែធ្វើឱ្យយើងស្ថិតក្នុងភាពច្របូកច្របល់ប៉ុណ្ណោះទេ ប៉ុន្តែវាថែមទាំងបានជំរុញឱ្យធនាគារមានការច្នៃប្រឌិតខ្ពស់ក្នុងការផ្តល់សេវាកម្មបែបឌីជីថល ដល់អតិថិជនផងដែរ។ យើងបានសង្កេតឃើញថា និន្នាការនេះមានវត្តមានយ៉ាងសកម្មនៅក្នុងឧស្សាហកម្មទាំងអស់ក្នុងប្រទេសកម្ពុជា។

យើងបានសង្កេតឃើញកំណើនគួរឱ្យកត់សម្គាល់នៅលើបណ្តាញឌីជីថលរបស់យើងក្នុងឆ្នាំ២០២២ ដែលប្រតិបត្តិការតាមប្រព័ន្ធឌីជីថលសរុប បានកើនឡើង ៧២% សម្រាប់ចំនួនប្រតិបត្តិការ និងកើនឡើង ១៤១% សម្រាប់ចំនួនទឹកប្រាក់។ ធនាគារ ប្រៃសណីយ៍កម្ពុជា ក.អ ក៏បានធ្វើបច្ចុប្បន្នភាពប្រព័ន្ធធនាគារស្នូលដើម្បីពង្រឹងមូលដ្ឋានគ្រឹះឱ្យកាន់តែរឹងមាំ សម្រាប់រាល់ប្រតិបត្តិការតាមប្រព័ន្ធឌីជីថលរបស់យើង ហើយនេះក៏បង្ហាញពីការប្តេជ្ញាចិត្តរបស់យើងក្នុងការលើកម្ពស់បរិយាបន្នហិរញ្ញវត្ថុនៅប្រទេសកម្ពុជាផងដែរ។ ក្នុងឆ្នាំ២០២១ ប្រព័ន្ធបាគងមាន ៨,១៦លានប្រតិបត្តិការ (៨០%ជាប្រាក់ដុល្លារអាមេរិក) ជាមួយនឹងទំហំទឹកប្រាក់ ២,៨៩ពាន់លានដុល្លារអាមេរិក បើធៀបនឹងឆ្នាំ២០២០ មានការកើនឡើង ៨.២០០%។ KHQR របស់ធនាគារជាតិនៃកម្ពុជា ត្រូវបានប្រើប្រាស់យ៉ាងទូលំទូលាយក្នុងឆ្នាំ២០២២ ដែលបានធ្វើឱ្យការទូទាត់ឆ្លងធនាគារកាន់តែមានភាពងាយស្រួល។

យើងពិតជាសប្បាយចិត្តដែលធនាគារ ប្រៃសណីយ៍កម្ពុជា ក.អ សម្រេចបាននូវទ្រព្យសកម្មចំនួន ១,២ពាន់លានដុល្លារអាមេរិក ជាមួយផលប័ត្រប្រាក់កម្ចីកើនឡើងក្នុងកម្រិតមធ្យម ១៦,៨% និងទទួលបានប្រាក់ចំណេញ ២០លានដុល្លារអាមេរិកក្នុងឆ្នាំ២០២២។ ធនាគារ បានបង្កើនចំនួនម៉ាស៊ីនATM ទូទាំងប្រទេស រហូតដល់៣២៤ទីតាំង ដែលក្នុងនោះក៏មានម៉ាស៊ីនដាក់ប្រាក់តាមរយៈដៃគូផ្សេងៗរបស់ធនាគារ ដើម្បីធានាបាននូវលទ្ធភាពប្រើប្រាស់កាន់តែច្រើន និងល្អប្រសើរសម្រាប់អតិថិជន។ ធនាគារបានរក្សាលំហូរសាច់ប្រាក់ និងដើមទុនប្រកបដោយប្រសិទ្ធភាពក្នុងរយៈពេលពេញមួយឆ្នាំនេះ។ ក្រុមហ៊ុនបុត្រសម្ព័ន្ធរបស់ធនាគារ គឺគ្រឹះស្ថានមីក្រូហិរញ្ញវត្ថុហ្វូណន ក៏បានគ្រប់គ្រងប្រាក់ចំណេញបានយ៉ាងល្អផងដែរក្នុងឆ្នាំ២០២២។ ធនាគារក៏បានពង្រឹងភាពជាដៃគូជាមួយគ្រឹះស្ថានហិរញ្ញវត្ថុផ្សេងៗដូចជា អេ អឹម ខេ និងអម្រឹត ដើម្បីពង្រីកការផ្សព្វផ្សាយ និងបង្កភាពងាយស្រួលដល់អតិថិជនក្នុងការបង់សងប្រាក់កម្ចីប្រចាំខែ ដោយមិនចាំបាច់ទៅសាខាធនាគារឡើយ។

ធនាគារបានសង្កេតឃើញថា ការប្រើប្រាស់ប្រព័ន្ធផ្តល់ប្រាក់កម្ចីរបស់ធនាគារកាន់តែច្រើន ដែលនេះមិនត្រឹមតែធ្វើឱ្យចំណេញពេលវេលាប៉ុណ្ណោះទេ ប៉ុន្តែថែមទាំងបង្ហាញនូវការប្តេជ្ញាចិត្តរបស់ធនាគារក្នុងការលើកម្ពស់ការថែរក្សាបរិស្ថាន និងការប្រកបអាជីវកម្មប្រកបដោយនិរន្តរភាពផងដែរ។ ធនាគារសម្រេចបាននូវសមិទ្ធផលសំខាន់មួយទៀតក្នុងឆ្នាំ២០២២ គឺការធ្វើបច្ចុប្បន្នភាពប្រព័ន្ធធនាគារស្នូល ដែលបានពង្រឹងសមត្ថភាពទាំងមូលរបស់ធនាគារក្នុងការផ្តល់នូវបទពិសោធន៍កាន់តែប្រសើរឡើងដល់អតិថិជន។ ខ្ញុំពិតជារីករាយដែលគណៈគ្រប់គ្រងជាន់ខ្ពស់របស់ធនាគារបានខិតខំធ្វើការអស់ពីកម្លាំងកាយចិត្ត ដើម្បីធ្វើឱ្យប្រសើរឡើងមួយកម្រិតទៀត នូវការផ្តល់សេវាកម្មជូនអតិថិជន និងសម្រេចឱ្យបាននូវការប្តេជ្ញាចិត្តនានាក្នុងរយៈពេលពេញមួយឆ្នាំនេះ។

ខ្ញុំសូមថ្លែងអំណរគុណចំពោះភាគទុនិកទាំងអស់សម្រាប់ការជឿទុកចិត្ត និងសមាជិកក្រុមប្រឹក្សាភិបាលទាំងអស់សម្រាប់ការចែករំលែកបទពិសោធន៍របស់ពួកគេចំពោះគណៈគ្រប់គ្រងធនាគារ។ ខ្ញុំក៏សូមថ្លែងអំណរគុណចំពោះរាជរដ្ឋាភិបាលកម្ពុជា និងស្ថាប័ននិយតកម្ម ជាពិសេសធនាគារជាតិនៃកម្ពុជា អគ្គនាយកដ្ឋានពន្ធដារ ក្រសួងសេដ្ឋកិច្ច និងហិរញ្ញវត្ថុ ក្រសួងសុខាភិបាល ដែលបានគាំទ្រកន្លងមក។ ខ្ញុំក៏សូមថ្លែងអំណរគុណយ៉ាងជ្រាលជ្រៅចំពោះអតិថិជនទាំងអស់របស់ធនាគារ សម្រាប់ការជឿទុកចិត្ត និងការគាំទ្ររបស់ពួកគេ។ ខ្ញុំសង្ឃឹមយ៉ាងមុតមាំថា យើងនឹងរួមគ្នា ដើម្បីរួមចំណែកជំរុញប្រទេសកម្ពុជាឱ្យមានភាពរីកចម្រើនផ្នែកសេដ្ឋកិច្ច ក្នុងនាមជាប្រទេសដែលមានកំណើនសេដ្ឋកិច្ចលឿនបំផុតមួយ។